Policia turke arrestoi sot 11 persona për mbështetjen e bojkotit njëditor të blerjeve një ditë më parë, si pjesë e një proteste kundër burgosjes së kryetarit të Stambollit Ekrem Imamoglu, rivalit kryesor të presidentit Rexhep Tajip Erdogan në zgjedhjet e ardhshme, njoftuan mediat shtetërore turke.

Prokuroria e Stambollit ka lëshuar urdhra arresti për 16 të dyshuar në hetimin e “urrejtjes dhe diskriminimit” dhe “nxitjes së urrejtjes dhe armiqësisë” në publik.

Midis të arrestuarve është edhe aktori Cem Jigit Uzumoglu, i cili luajti Sulltan Mehmed Pushtuesin në serinë e dokumentarëve të Netflix “Rise of an Empire: The Ottoman Empire”, njoftoi Unioni i Aktorëve.

Të dyshuarit u arrestuan për shkak të postimeve në mediat sociale që u kërkonin njerëzve të mos shpenzojnë para të mërkurën dhe bizneset të mbyllin dyert e tyre në shenjë solidariteti.

Protestat në shkallë të gjerë antiqeveritare filluan muajin e kaluar pas burgosjes së kryetarit të bashkisë opozitare të Stambollit, Ekrem Imamoglu, me akuza për korrupsion që kritikët thonë se janë të motivuara politikisht.

Qeveria këmbëngul se gjyqësori është i pavarur dhe se nuk ka ndërhyrje politike./euronews